كيك الأناناس المقلوب Upside Down Pineapple Cake
مرحبا ويسعد اوقاتكم بكل خير يا حلوين
اليوم لح نعمل كيك الاناناس المقلوب وهي كتير طيبة وخصوصي للي بيحبو الكاراميل والوصفات اللي فيها فواكه وسريعة وما بدها اغراض كتير لهيك لما تجربي الوصفة وتعجبك خلي دايما عندك علبة اناناس بالبيت ولما تعرفي إنو في ضيوف جايين بنفس اليوم حضري الوصفة وزبطي امورك
لح نبلش بالمقادير ومتل العادة الخطوات لح تكون مصورة بالتفاصيل
المقادير:
للكيك:
بيضة واحدة
نصف ملعقة صغيرة فانيلا
نصف كوب زيت
علبة لبن (زبادي) حلوة وليست حامضة ما يقارب ال 170 غرام لبن
نصف كوب سكر
كوب طحين
ملعقة كبيرة بيكينغ بودر
للكراميل:
4 ملاعق زبدة
5 ملاعق سكر بني
علبة اناناس
حبات كرز السكر (إختياري)
الخطوات:
أول خطوة لح نحط البيضة في وعاء منخفقو شوي ومنضيف الفانيلا
منرجع منضيف السكر ثم الزيت ثم اللبن الحلو
منرجع منضيف السكر ثم الزيت ثم اللبن الحلو
منضيف فوقهم الطحين والبيكينغ بودر ومنخفق ومنخلي هالخليط اللي حصلنا عليه على جنب
في صنية الخبز ممكن تستعملو اي صنية عندكم مدورة، مربعة، مجوفة الوسط كلو بيمشي
منحط ورق الزبدة وهلق مرحلة مكونات الكراميل أول شي منضيف الزبدة منسوحها شوي فوق الغاز بعدما نضيفها فوق ورق الزبدة
منضيف السكر البني
وبعدين علبة الأناناس وممكن تضيفي كرز السكر في حال تواجد
ولو مش موجود عادي تخطي الموضوع منو اساسي أبدا
ونصيحتي ما تاخري تجربة الوصفات كرمال أمور مش أساسية
منضيف خليط الكيك فوق الاناناس ومنحطها في الفرن على حرارة 170 درجة مئوية لمدة نصف ساعة تقريبا من تحت تقريبا او حتى تستوي وبعدين لدقيقتين من فوق لحتى تتحمر
فيك تقلبي الكيك لما يبرد لحتى يطلع بسهولة وما يفرط
انا بنصح بشدة إنو تستعملي ورق الزبدة هوني في حال كان متواجد لأني جربتو لمرات بلا ورق الزبدة وصار الكاراميل يعلق بأسفل الصنية وما بيطلع بالسهل بينما مع ورق الزبدة بيضلو كلو مع الكيك
اتركي الكيك يبرد بالبراد قبل ما تقدميه مع شاي مثلا أو عصير
وباالهنا والعافية
لمزيد من الوصفات تابعي صفحاتي على مواقع التواصل الإجتماعي
تذوقت في محلات كب كيك في دبي كب كيك بطعم التوت البري، إن لم أجد توت بري طازج لأصنع مثلها، هل يمكن استخدام صوص التوت؟
ReplyDelete