Almond Pound Cake (Gluten-Free) كيك اللوز
يسعد أوقاتكم بكل خير
كيك اليوم طيبة ومفيدة ومرغوبة من الكل وانا شخصياً انغرمت فيها وصرت حاطتها ضمن الوصفات اللي بتنعاد دايماً لبيتي
بيستفيد من هالوصفة اللي عندهم حساسية ضد الأطعمة اللي فيها غلوتن لانو لح نعملها باللوز البودرة بدال الطحين
وممكن كمين تنعمل الوصفة نفسها بالطحين العادي للأشخاص اللي ما عندهم حساسية ولامصابين بالسيلياك
قبل ما بلش بالمقادير بدي عيد وزيد انو الكيك جداً لذيذة وبنصحكم تجربوها بقوة
المقادير
كوبين طحين اللوز وممكن كمين تستخدمو الطحين العادي المتعدد الإستعمالات في حال ما عندكم اي حساسية على الطحين
ملعقة كبيرة بيكينغ بودر
خمس بيضات
نصف ملعقة صغيرة فانيلا
كوب وربع سكر
رشة ملح
كوب زبدة حيواني او كوب زيت
سنحتاج أيضاً إلى قطع لوز مقطعة طولياً اللي بتشبه الصنوبر بالشكل
الخطوات
بوعاء منخفق خمس بيضات مع فانيلا ورشة الملح ومنرجع منضيف السكر تدريجيا مع الخفق ليصير قوام البيض كريمي متل ما بتوضح الصور
منرجع منضيف الزبدة أو الزيت
بوعاء تاني منحط بودرة اللوز مع البيكينغ بودر ومنخلطهم ومنضيفهم لخليط الكيك
وءاخر مرحلة بتضيفي قطع اللوز المقطعة
انا ما حطيت كمية كبيرة لانو استعملت بودرة اللوز بس في حال رغبت تعمليها بالطحين العادي فممكن تعوضي باللوز القطع لحتى تكون طعمة اللوز موجودة (حطي حوالي النص او ثلثين كوب قطع اللوز)
منخلط للمرة الأخيرة
بصنية الفرن منرشها بالبراي او مندهن بالزبدة ومنحط ورق الزبدة
منجع منضيف الخليط وممكن تضيفي لوز من فوق قبل الخبز (اختياري) ومنخبزو بفرن محمى من تحت على حرارة 180 درجة مئوية على الرف الوسط لمدة 50 دقيقة او لحتى ينضج الكيك
وللتحمير دقيقتين من فوق بعدها
بترككم مع الصور
بالعافية والهنا على قلبكم
لمزيد من الوصفات تابعوا صفحاتي على مواقع التواصل الإجتماعي
No comments:
Post a Comment